TikTok po paditet nga një aktore e cila pretendon se zëri i saj është përdorur pa leje në shërbimin viral text-to-speech. Në proçesin gjyqësor të filluar javën e kaluar tregohet se zëri i Bev Standing është përdorur për të përsëritur “fjalë mjaft ofenduese” dhe se TikTok i ka shkaktuar asaj një dëm të pariparueshëm.
Është akoma e paqartë mënyra se si zëri i Standing mund të jetë përdorur nga TikTok, të paktën me aq sa tregohet deri më tani në këtë proçes. Megjithatë origjina e saj mund të jetë një regjistrim që Standing ka bërë disa vite më parë për një grup të quajtur Institute of Acoustics. Këto regjistrime do të përdoreshin për përkthimin e teksteve kineze si pjesë e një kontrate me një kompani të panjohur nga Kina. Ajo thotë se nuk e ka autorizuar IOA për transferimin e këtyre të dhënave drejt kompanive të tjera për përdorim të mëvonshëm.
Bev Standing zbuloi këtë ngjarje për herë të parë kur ky shërbim u bë viral në TikTok, i cili i jepte përdoruesve mundësinë e leximit me një zë dixhital të tekstit të shkruar në video. Dhe pse shërbimi e bëri zërin e saj të famshëm, ai mund të ndikojë në punën e Bev në reklama dhe radio.
