Meta, Google, TikTok dhe X janë zotuar secila para ligjvënësve evropianë se do të bëjnë më shumë për të parandaluar dhe eleminuar gjuhën e urrejtjes në platformat e tyre.
Komisioni Evropian integroi një grup të rishikuar angazhimesh vullnetare në Aktin e Shërbimeve Dixhitale (DSA) të hënën që synojnë të ndihmojnë platformat “të demonstrojnë pajtueshmërinë e tyre” me detyrimet e DSA në lidhje me moderimin e përmbajtjes së paligjshme.
Facebook, Instagram, TikTok, Twitch, X, YouTube, Snapchat, LinkedIn, Dailymotion, Jeuxvideo.com, Rakuten Viber dhe shërbimet e konsumatorit të organizuara nga Microsoft kanë nënshkruar të gjithë “Code of Conduct on Countering Illegal Hate Speech Online Plus” – që është një përditësim i një Kodi të 2016-ës.
Kodi i rishikuar i angazhon nënshkruesit për transparencë rreth zbulimit dhe reduktimit të gjuhës së urrejtjes, për të lejuar monitoruesit e palëve të treta të vlerësojnë se si njoftimet e gjuhës së urrejtjes shqyrtohen nga platformat dhe të shqyrtojnë “të paktën dy të tretat e njoftimeve për gjuhën e urrejtjes” brenda 24 orëve.
“Urrejtja dhe polarizimi janë kërcënime për vlerat dhe të drejtat themelore të BE-së dhe minojnë stabilitetin e demokracive tona. Interneti po përforcon efektet negative të gjuhës së urrejtjes”, tha në një deklaratë komisioneri i BE-së Michael McGrath. “Ne besojmë se Code of conduct+ do të bëjë pjesën e tij për të siguruar një përgjigje të fortë.”
Këto Kode Sjelljeje të BE-së janë angazhime vullnetare dhe kompanitë nuk përballen me asnjë ndëshkim nëse vendosin të tërhiqen nga marrëveshja, siç bëri Elon Musk me X në vitin 2022 kur ai tërhoqi kompaninë nga Kodi i Praktikave për Dezinformimin.
