Në një seri postimesh në X, pronari miliarder i platformës kërcënoi me veprime ligjore “në mënyrë që njerëzit e Evropës të dinë të vërtetën“.
Elon Musk ka lëshuar disa akuza drejt Komisionit Evropian, duke pretenduar se ai u përpoq të bënte një “marrëveshje sekrete të paligjshme” me X mbi respektimin e rregullave të reja të BE-së për të parandaluar dezinformimin në internet. Kjo vjen pasi Komisioni njoftoi të premten se platforma e mediave sociale e Musk, e njohur më parë si Twitter, kishte shkelur elementet e Aktit të Shërbimeve Dixhitale të BE-së (DSA).
“Komisioni Evropian i ofroi X-së një marrëveshje të fshehtë të paligjshme: nëse censuronim fjalimin në heshtje pa i thënë askujt, ata nuk do të na gjobisnin”, postoi Musk në X. “Platformat e tjera e pranuan atë marrëveshje. X jo“.
Në një shkëmbim të veçantë në platformë, Musk kërcënoi se do ta çonte çështjen e tij në gjykatë pas akuzave të Komisionit. DSA, një grup rregullash gjithëpërfshirëse që rregullon platformat – duke përfshirë Facebook, YouTube dhe të tjera – përgjegjëse për mbrojtjen e përdoruesve evropianë dhe heqjen e përmbajtjeve të dëmshme dhe dezinformatave, hyri në fuqi në shkurt të këtij viti.
Akuzat kundër X janë të parat që ngrihen sipas ligjit të ri, me shkelje që mbartin gjoba të mëdha ekuivalente me 6% të të ardhurave globale të platformës. Musk nuk dha asnjë detaj të mëtejshëm rreth kushteve të “marrëveshjes sekrete” të raportuar.
