Aplikacioni më i nxehtë i momentit edhe pse i jo i hapur për publikun është Clubhouse.
Që nga koha kur ligjërata e Elon Musk arriti në 5000 dëgjues në fund të janarit, vlera e tij ka arritur në biliona.
Clubhouse është një rrjet social i orientuar drejt materialeve audio. Praktikisht ai funksionon si një sallë konference gjigande ku dëgjuesit mund të bëhen pjesë nga e gjithë bota. Dhomat e dëgjimit janë të shumta dhe temat variojnë nga më të ndryshmet, që nga seancat e terapisë, këshillat mbi profesionet, kurset e gjuhëve, menaxhimi i karrierës etj.
Çdo seancë ka një folës, i cili mund të jetë ose jo i famshëm dhe të tjerët futen për të dëgjuar. Folësi kryesor është host, ndaj edhe mund të menaxhojë kush nga pjesmarrësit ka të drejtë fjale. Dëgjuesit e thjeshtë mund “të ngrenë dorën” për të marrë të drejtën e fjalës.
Seancat e ligjëratave qëndrojnë në platformë dhe mund të dëgjohen në formën e podcasteve të pa modifikuara.
Ekskluziviteti i tij qëndron në faktin që funksionon për momentin vetëm për iOS dhe që të bëhesh pjesë e tij duhet të të ftojë një përdorues aktual i tij. Secili përdorues i ri ka 4 ftesa në dispozicion, e që tani është krijuar një treg me ankande dhe çmime të kripura për t’u bërë pjesë e tij.
Kjo iniciativë për të krijuar një rrjet social më miqësor me mendimin dhe edukimin vlen shumë. Me 3 milion shkarkime dhe 2 milion përdorues aktivë ai kushton sot $1 bilion.
Krahasuar me gjigandët e rrjeteve sociale nuk është asgjë, por financimet më të fundit dëshmojnë potencialin e madh të tij.
