Google Chrome në desktop do të marrë një shërbim tepër të mirëpritur si Circle to Search, i cili ishte i disponueshëm vetëm nëpër smartphone. Ky shërbim i fuqizuar nga Google Lens, duhet të mbërrijë së shpejti në browser.
Siç raporton 9to5Google, në një Chromebook, funksioni do të aktivizohet duke klikuar në një ikonë Google Lens në shiritin URL të Chrome, por do të jetë pak më i fshehur në Windows 11 ose macOS.
Jashtë ChromeOS, do t’ju duhet të shkoni në menynë e Chrome dhe të zgjidhni “Search with Google Lens“. Cilado rrugë që të merrni, pasi të aktivizoni funksionin, mund të nënvizoni diçka në një faqe interneti që dëshironi të kërkoni, qoftë ky një element i një fotografie ose video.
Rezultatet e kërkimit të imazheve do t’ju paraqiten më pas me shpejtësi në një shirit anësor në të njëjtën skedë si faqja e internetit. Ky është një ndryshim relativisht i vogël në disa aspekte – shtimi i vetëm një ikone të vogël, ose një opsioni menyje në Windows/Mac – por është një ndryshim që mund të ketë një ndikim të madh në mënyrën se si kërkoni duke përdorur Google Chrome.
Çfarëdo që të shikoni në browserin tuaj të desktopit, si përshembull një makinë në sfondin e një videoje, mjafton ta ndaloni atë, të aktivizoni “Search with Google Lens“, të rrethoni makinën e përmendur dhe të merrni të gjitha informacionet rreth këtij automjeti.
Megjithatë, për momentin shërbimi është ende në zhvillim dhe po testohet nga përdoruesit e versionit beta 128 të Chrome, por që shumë shpejt do të jetë i disponueshëm për të gjithë përdoruesit.
