Kompania kineze ByteDance, që zotëron TikTok, po zhvillon një version ekskluziv për SHBA-në të aplikacionit, të quajtur “M2,” i cili pritet të prezantohet më 5 shtator. Ky version i ri do të jetë në pronësi të investitorëve amerikanë dhe të gjithë përdoruesit në SHBA do të duhet ta përditësojnë aplikacionin për të vazhduar përdorimin e TikTok. Pas lançimit të M2, versioni aktual do të hiqet nga dyqanet e aplikacioneve në SHBA, por do të vazhdojë të funksionojë deri në mars 2026, kur do të çaktivizohet plotësisht në SHBA.
Aplikacioni M2 po zhvillohet vetëm për tregun amerikan dhe do të jetë i disponueshëm vetëm përmes dyqaneve amerikane të aplikacioneve. Pjesa tjetër e botës do të vazhdojë të përdorë TikTok-un aktual, që mbetet nën kontrollin e Kinës.
Ky ndryshim vjen pas një ligji të nënshkruar nga Presidenti Joe Biden në prill 2024, që kërkon që ByteDance të shesë operacionet e TikTok në SHBA ose të përballet me ndalim kombëtar. Edhe pse ByteDance e apeloi, një gjykatë federale e konfirmoi ligjin. Administrata Trump, që tani po mbikëqyr zbatimin, e ka shtyrë afatin për mesin e shtatorit 2025.
ByteDance po punon me kompani amerikane dhe investitorë si Oracle për të krijuar entitetin e ri të M2. Investitorët amerikanë do të kenë shumicën, ndërsa ByteDance mund të mbajë një pjesë të vogël në përputhje me Aktin për Mbrojtjen e Amerikanëve nga Aplikacionet e Kontrolluara nga Kundërshtarë të Huaj.
Presidenti Trump ka deklaruar se “njerëz shumë të pasur” janë të interesuar për blerjen e TikTok, por nuk ka zbuluar emrat. Ai shtoi se marrëveshja ndoshta kërkon miratim nga qeveria kineze, por dyshon se Presidenti Xi Jinping do e lejojë.
