Pothuajse 1 vit pasi Elon Musk dha idenë që Twitter duhet të bëjë publik algoritmin e përdorur për të rekomanduar postime, kompania e publikoi source code në GitHub. Më pas Musk organizoi një Twitter Space për të diskutuar këtë lëvizje, ku tregoi se shpreson që përdoruresit do të jenë në gjendje të gjejnë probleme “potenciale” që gjenden në këtë algoritëm dhe të ndihmojnë në përmirësimin e tij.
“Publikimi fillestar i të ashtuquajturit algoritëm mund të jetë disi i sikletshëm dhe njerëzit do të gjejnë shumë gabime në të, por ne do t’i rregullojmë këto gabime menjëherë.” tha Musk.
Pjesa e source code të publikuar në GitHub tregon vetëm mënyrën se si tweets të ndryshëm shfaqen në feed-in “For You” në platformë. Kompania nuk ka publikuar pjesën tjetër të kodit për algoritmin e kërkimit apo mënyrës se si përmbajtjet shfaqen në pjesët e tjera të Twitter, megjithatë Musk premtoi se kompania do t’i publikojë dhe këto pjesë së shpejti.
Përmes një postimi në blog Twitter tregoi se si ky algoritëm funksionon, duke përfshirë këtu renditjen dhe filtrimin e përmbajtjeve. Megjithatë përdoruesit e Twitter kanë gjetur disa detaje interesante në këtë source code. Ato mësuan se algoritmi i Twitter arrin të dallojë nëse një përdorues është mbështetës i Partisë Republikane apo asaj Demokratike për shtetasit amerikanë.
Një inxhinier shpjegoi më vonë se këto grupime bëhen thjeshtë për mbledhjen e statistikave si dhe për të mos treguar mbështetje të njëanshme kundrejt një grupi personash.
