E si të mos e dashurosh Xiaomi kur sheh vendosmërinë e saj për të sjellë inovacione të çmendura për të cilat ne, entuziastët e teknologjisë, kemi kohë që presim me ankth.
“Karikim wireless në distanca deri në disa metra” shkruan Xiaomi teksa përshkruan këtë teknologji të re e cila nuk është thjesht një patentë në një copë letër, por një aparat funksional.
Epo, ndoshta kjo e fundit mbetet për t’u parë. Në një postim në Twitter, kompania ka prezantuar një kuti goxha të madhe e cila duket sa një tavolinë anësore, nga ku supozohet se do të jetë terminali dërgues.
Përdoruesi do të vazhdojë të përdorë smartphonin pa e lidhur apo lënë në ndonjë sipërfaqje e sa kohë ndodhet në rrezen e saj do të marrë karikim, madje as objektet midis nuk do e pengojnë.
Transmetuesi do të dërgojë valë mmWave nëpërmjet antenave të veta, smartphoni do të pajiset me marrës të posatshëm të cilat do e kthejnë sinjalin në impuls elektrik me anë të një qarku të veçantë.
Shpejtësia e karikimit nuk do të jetë më e madhe se 5W pra le të themi që do të jetë mjaft e ngadaltë, por hei, a nuk do jetë “cool” të biesh të flesh dhe të mos shqetësohesh se nuk i ke vënë smartphonit kabullin? Pvr më tepër teknologjia është vetëm në hapat e veta të para, brenda kësaj dekade ndoshta ajo do të bëhet aq mainstream sa do kalojmë nga njëra ndërtesë në tjetrën dhe aparatet tona do të karikohen automatikisht.
Xiaomi ende nuk ka deklaruar data lançimi, por përderisa produkti është gati nuk besojmë të vonojë.
