Elon Musk ka shitur platformën e rrjeteve sociale X tek kompania e tij e inteligjencës artificiale xAI në një marrëveshje totale prej $33 miliardë, siç u bë e ditur nga një deklaratë e vetë miliarderit të premten. Të dyja kompanitë janë në pronësi private, që do të thotë se nuk janë të detyruar të zbulojnë marrëveshjen e tyre financiare për publikun.
Musk tha në një postim në X se masa do të “zhbllokojë potencialin e jashtëzakonshëm duke kombinuar aftësinë dhe ekspertizën e avancuar të inteligjencës artificiale të xAI me aksesueshmërinë masive të X“. Ai tha se në marrëveshje xAI u vlerësua në $80 miliardë dhe X në $33 miliardë.
Musk, i cili shërben si CEO i Tesla dhe SpaceX, si dhe këshilltar i Presidentit Donald Trump, bleu platformën e quajtur Twitter për $44 miliardë në 2022, shkarkoi pjesën më të madhe të stafit ekzistues dhe ndryshoi politikat e saj për gjuhën e urrejtjes, dezinformimin dhe verifikimin e përdoruesve. Të gjitha këto ndryshime u kurorëzuan dhe me ndryshimin e emrit të platformës në X. xAI ishte një iniciativë që u nis një vit pas blerjes së Twitter.
“E ardhmja e xAI dhe X janë të ndërthurura. Sot, ne zyrtarisht ndërmarrim hapin për të kombinuar të dhënat, modelet, llogaritjen, shpërndarjen dhe talentin. Ky kombinim do të zhbllokojë potencialin e jashtëzakonshëm duke kombinuar aftësinë dhe ekspertizën e avancuar të inteligjencës artificiale të xAI me aksesueshmërinë masive të X,” shkroi Musk në X.
Nuk është e qartë nëse lëvizja do të shkaktojë ndonjë ndryshim të dukshëm për përdoruesit X – xAI tashmë përdor të dhëna nga postimet e përdoruesve X për të trajnuar modelet e saj të inteligjencës artificiale dhe përdoruesit e abonuar në X kanë akses në chatbotin e tij të AI, Grok, ndërsa përdoruesit që nuk paguajnë mund t’i bëjnë chatbot 10 pyetje çdo 2 orë.
