Studiuesit amerikanë po punojnë për të krijuar disa aroma që do të shfaqen kur astronuatët do të përdorin VR. Këto aroma kanë si qëllim mbrojtjen e shëndetit mendor të astronautëve ndërkohë që ato kryejnë misionin disa vjeçar në hapësirë.
“Përgjatë misioneve me kohë të gjatë në hapësirë, astronautët përjetojnë një mungesë aktiviteti të disa shqisave. Kjo gjë mund të sjellë pasoja të dëmshme në disa nivele, që nga përgjigjja fiziologjike kundër stresit e deri në ndryshime të sjelljes dhe mirëqeniës në përgjithësi.” tha Dr. Ana Diaz Artiles.
Hapësira është një vend i vetmuar, mirëpo gjatë viteve të ardhshme NASA dëshiron të dërgojë astronautë në Hënë, të cilët do të qëndrojnë atje për një kohë të konsiderueshme, dhe më pas të shkojnë drejt Marsit.
Meqë misionet e tyre do të zgjasin kaq shumë, studiuesit duhet të sigurojnë shëndetin mendor të astronautëve. Fluturimi drejt Planetit të Kuq pritet të zgjasë për 3 vite, ndërkohë që komunikimi me Tokën do të vonohet rreth 20 minuta.
Kontakti social me Tokën ose pakot e ndryshme që dërgohen në Stacionin Hapësinor Ndërkombëtar në ditët e sotme do të jenë të pamundura për t’u kryer në misionet e gjata. Prandaj Dr. Diaz Artiles dëshiron të përdorë realitetin virtual si një mjet për të ruajtur shëndetin mendor të astronautëve. Një ndër fokusimet e këtij projekti është dhe krijimi i aromës së ambienteve të ndryshme.
“Ne po krijojmë eksperienca virtuale të cilat do të kërkojnë aktivizimin e shqisave të ndryshme, gjë që do të përmirësojë shëndetin dhe performancën e këtyre individëve.” tha Artiles. Kur ne ndiejmë aromën e diçkaje, informacioni olfaktor transmetohet në sistemin limbik. Një parfum, për shembull, mund të nxisë disa emocione të veçanta.
