Modeli bazë i ri i MacBook Pro 13” me proçesor M2 me sa duket ka shpejtësi më të ngadaltë SSD se paraardhësi i tij me proçesor M1.
MacRumors raporton se Max Tech dhe Created Tech, dy youtubers, kanë testuar modelin bazë MacBook Pro 256GB M2 dhe zbuluan se shpejtësitë e leximit të SSD janë rreth 50% më të ngadalta se në MacBook Pro 256GB M1. Kohët e shkrimit janë rreth 30% më të ngadalta.
Testimi u krye duke përdorur aplikacionin Disk Speed Test të Blackmagic, dhe Max Tech e hapi kapakun e pasëm të MacBook Pro M2 ku zbuloi se Apple po përdorte një çip të vetëm NAND flash storage. Nga ana tjetër paraardhësi i tij përdor dy çipe 128GB NAND, pasi çipet e vendosura në paralel mund të rrisin shpejtësitë e SSD.
Megjithatë kjo gjë vlen vetëm për modelin bazë të MacBook Pro M2 me 256GB internal storage, pasi njësitë e tjera nuk duket të preken nga ky problem. Një tjetër youtuber testoi modelin 512GB dhe zbuloi shpejtësi të ngjashme SSD me modelin M1.
Nëse shpejtësitë e SSD janë një problem për ju, atëherë ju do të duhet të shtoni dhe $200 për të blerë versionin me 512GB. Ose ndoshta mund të sakrifikoni shumë pak performancë dhe të blini një MacBook Air M2, nëse një gjë e tillë nuk është aplikuar në këtë laptop. Mbetet për t’u parë nëse Air do të ketë 2 çipe NAND.
