Ukraina prezantoi të mërkurën një zëdhënëse të krijuar nga AI, të quajtur Victoria, e cila do të bëjë deklarata zyrtare në emër të ministrisë së saj të jashtme. Ministria tha se “për herë të parë në histori” do të përdorte një zëdhënës dixhital për të lexuar deklaratat e saj, të cilat do të shkruhen nga njerëzit.
E veshur me një kostum të errët, zëdhënësja u prezantua si Victoria Shi, një “person dixhital”, në një prezantim të postuar në rrjetet sociale. Victoria duket mjaft reale, pasi arrin të kryejë lëvizje të duarve dhe kokës teksa flet. Shërbimi për shtyp i ministrisë së jashtme tha se deklaratat e dhëna nga Shi nuk do të gjenerohen nga AI, por “të shkruara dhe verifikuara nga njerëz të vërtetë“.
“Është vetëm pjesa vizuale që AI na ndihmon të gjenerojmë”, tha Dmytro Kuleba, Ministri i Jashtëm ukrainas, duke shtuar se zëdhënësja e re ishte një “hap teknologjik që asnjë shërbim diplomatik në botë nuk e ka bërë ende”. Arsyeja kryesore për krijimin e saj ishte “kursimi i kohës dhe burimeve” për diplomatët, tha ai.
Krijuesit e Shi janë një ekip i quajtur Game Changers, të cilët kanë krijuar gjithashtu përmbajtje me realitet virtual në lidhje me luftën në Ukrainë. Emri i zëdhënësit bazohet në fjalën “fitore” dhe frazën ukrainase për inteligjencën artificiale: shtuchniy intelekt.
Pamja dhe zëri i Shi janë modeluar sipas një personi real: Rosalie Nombre, një këngëtare dhe ish-konkurrente në versionin ukrainas të reality shoë The Bachelor. Nombre lindi në qytetin e Donetsk, të kontrolluar nga Rusia, në Ukrainën lindore.
Ministria tha se Nombre mori pjesë pa pagesë. Ai theksoi se Shi dhe Nombre “janë dy njerëz të ndryshëm” dhe se vetëm figura e AI do të japë deklarata zyrtare. Për të shmangur falsifikimet, deklaratat do të shoqërohen me një kod QR që i lidh ato me versionet me tekst në faqen e internetit të ministrisë.
