CEO i Apple, Tim Cook ka reaguar ndaj mesazhit falenderues të dërguar nga një dentist, pasi një Apple Watch i shpëtoi jetën përmes shërbimit EKG.
Nitesh Chopra, një dentist në Haryana, Indi, ndjeu disa dhimbje në zonën e gjoksit, dhe kjo gjë e shtyu të përdorte shërbimin EKG që ofrohet në Apple Watch Series 6 dhe më të reja. Pasi ai pa rezultatet, Chopra dhe gruaja e tij Neha u konsultuan me një doktor rreth simptomave dhe rezultateve të EKG nga smartwatch.
Më vonë u zbulua se ai kishte një arterie të bllokuar dhe doktorët nisën trajtimin e këtij problemi. Pas ndërhyrjes, Nitesh tha se ishte i bekuar dhe nuk mund të shprehte mjaftueshëm mirënjohjen e tij ndaj Apple Watch, pasi ajo e ndihmoi të kuptonte sëmundjen në fazat e para.
“Fillimisht unë e përdorja Apple Watch si një aksesor modern për të parë orën dhe për të matur hapat që bëja gjatë ditës, dhe nuk e imagjinoja asnjëherë që një ditë do të më shpëtonte jetën.” tha ai. Kur ishin në spital, Nitesh dhe gruaja e tij u mahnitën kur panë saktësinë e shërbimit EKG në smartwatch, pasi e krahasuan atë me leximin që shfaqej nga pajisja e vërtetë në monitor.
Pas këtij problemi, ai i nisi menjëherë një email ku falenderonte Tim Cook që përmes Apple Watch arriti t’i shpëtonte jetë.
“Jam shumë i gëzuar që ju kërkuat menjëherë një vlerësim klinik dhe morët përkujdesjen që dëshironit. Faleminderit që e shpërndatë këtë histori me ne. Urimet më të mira, Tim.” u përgjigj në email Tim Cook.
