Tools for Humanity, një startup i bashkëthemeluar nga Sam Altman, ka lançuar sistemin e tij World të verifikimit të identitetit përmes skanimit të syve në SHBA. Gjatë një eventi në San Francisko, Altman tha se teknologjia e World ofron “një mënyrë për t’u siguruar që njerëzit të mbeten fokusi kryesor dhe të veçantë në një botë ku interneti ka shumë përmbajtje të krijuar nga AI“.
World njihej më parë si Worldcoin derisa Tools of Humanity vendosi të përqendrohej në aspektin e ID-së dixhitale të projektit në vend të pjesës së kriptomonedhës, sepse administrata Biden nuk kishte një qëndrim miqësor ndaj kriptomonedhave.
Projekti përdor objekte sferike me madhësinë e një topi basketbolli të quajtura Orb për të skanuar irisin e një përdoruesi, të cilat më pas i shndërron në një IrisCode unik për ta. Më pas do ta përdorë këtë informacion për të krijuar një World ID për përdoruesin që ata mund ta përdorin për t’u kyçur në platforma të integruara, duke përfshirë Minecraft dhe Reddit. Përdoruesit që verifikohen do të marrin falas disa nga kriptomonedhat e projektit.
Tools for Humanity tha se World mban njëfarë aksesi në të dhënat e përdoruesve për t’u siguruar që ata nuk po skanojnë dy herë të dhënat e tyre biometrike. Por tha gjithashtu se shumica e të dhënave personale që mbledh mbeten të decentralizuara, të anonimizuara dhe supozohet se janë të pamundura për t’u modifikuar për të identifikuar dikë.
World po hap gjashtë lokacione në Austin, Atlanta, Los Angeles, Nashville, Miami dhe San Francisco ku njerëzit mund të skanojnë irisin e syve. Gjatë eventit, projekti zbuloi gjithashtu se po punon në një pajisje më të vogël në formë smartphone të quajtur Orb mini, e cila mund të verifikojë identitetin e një personi.
Projekti ka prezantuar edhe partneritete të reja: Së shpejti do të lançojë kartën World Visa për njerëzit që kanë verifikuar identitetin e tyre dhe do të pilotojë mjetet e saj të verifikimit të identitetit dhe moshës me Tinder në Japoni.
