Teknologjia e veshshme po shkon drejt pajisjeve që duken si bizhuteri, dhe Lumia, një kompani inxhinierike nga Bostoni, sapo ka prezantuar hapin e radhës: vathët inteligjentë Lumia 2. Pas 6 vitesh zhvillim, kompania ka krijuar një tracker që duket si një aksesor i bukur, por ofron të dhëna shëndetësore që nuk gjenden në pajisje të tjera.
Ajo që e diferencon Lumia 2 është aftësia për të matur qarkullimin e gjakut në një arterie sipërfaqsore të veshit, shumë pranë trurit. Falë një sensori infra të kuq, pajisja zbulon rënie të menjëhershme të rrjedhës së gjakut drejt kokës, një faktor që ndikon në energji, fokus dhe mirëqenie të përgjithshme. Shumica e pajisjeve të tjera përdorin dritë të gjelbër dhe matin kapilarët sipërfaqësorë në dorë apo gisht, duke ofruar të dhëna më pak precize. Lumia 2 synon të sjellë një perspektivë të re mbi ndryshimet e përditshme të qarkullimit, të ndikuara nga gjumi, dieta, hidratimi dhe aktiviteti fizik.
Përveç këtyre matjeve unike, vathët monitorojnë dhe rrahjet e zemrës, gjumin, temperaturën dhe përgatitjen ditore. Pajisja është ndërtuar nga materiale jo alergjike si platini dhe titani, dhe ofrohet në disa stile, në ngjyrat ar, argjend dhe transparente. Bërthama inteligjente që qëndron pas veshit mund të lidhet me çdo lloj vathi, kështu që përdoruesit nuk kanë pse të heqin dorë nga bizhuteritë e tyre të preferuara.
Lumia 2 peshon vetëm 1 gram, është dizenjuar për t’u mbajtur 24/7 dhe funksionon me bateri të zëvendësueshme që zgjasin deri në një javë. Ka opsione edhe për përdorues pa shpim veshi, duke e bërë produktin të aksesueshëm për të gjithë. Edhe pse u zhvillua pjesërisht për pacientë me COVID, pajisja nuk është mjekësore, qëllimi i saj është vetë-njohja dhe përmirësimi i zakoneve.
Për të funksionuar kërkon abonim $9.99 në muaj, ndërsa çmimi i pajisjes është $249.
