Studiuesit nga University of Adelaide lajmëruan këtë javë se kishin arritur të gjeneronin hidrogjen të pastër nga uji i detit pa patur nevojë për filtrimin e tij më parë. Hidrogjeni i gjeneruar mund të përdoret si lëndë djegëse, pasi kur ai digjet prodhon vetëm ujë, dhe konsiderohet si një burim i pastër energjie.
“Ne kemi arritur të ndajmë ujin e detit në oksigjen dhe hidrogjen me një efiçiencë pothuajse 100%, për të prodhuar hidrogjen nëpërmjet elektrolizës duke përdorur një katalizator tepër të lirë.” tha profesori Shizhang Qiao, drejtues i këtij studimi.
Zakonisht uji i detit duhet të filtrohet para se proçesi i elektrolizës ta ndajë në oksigjen dhe hidrogjen. Ekipi i studiuesve treguan se duke përdorur oksidin e kobaltit dhe oksidin e kromit në sipërfaqje si katalizator, u arrit një performancë e ngjashme me përdorimin e katalizatorëve të shtrenjtë si platini dhe iridiumi.
Në krahasim me ujin që ne përdorim, uji i detit është shumë më lehtësisht i gjendshëm, dhe aftësia për të përdorur hidrogjenin e gjeneruar nga uji i detit si lëndë djegëse mund të kursejë shumë para.
Hapi i rradhës për ekipin e studiuesve është aplikimi në një shkallë më të gjerë të këtij projekti. Në të ardhmen shpresohet që zbulimet e bëra të aplikohen në prodhimin komercial të hidrogjenit.
