Tashmë që Evropa po përballet me një valë të nxehti të padurueshme, ndërkohë që çmimet e energjisë elektrike po rriten gjithnjë e më shumë, shtete të ndryshme kanë nisur të ndërmarrin disa masa, ku më kryesorja është limitimi i përdorimit të kondicionerit.
Spanja është shteti më i ri që i bashkohet kësaj nisme, duke i kërkuar qytetarëve të mos e përdorin kondicionerin nën temperaturën 27°C. Pra ajri i kondicionuar në të gjitha vendet publike do të vendoset mbi 27°C dhe dyert e këtyre ndërtesave do të mbahen të mbyllura për të kursyer energji.
Në “vendet publike” përfshihen zyrat, dyqanet, baret, teatrot, aeroportet dhe stacionet e trenit. Një gjë e tillë është rekomanduar dhe për të gjithë shtëpitë në Spanjë. Është menduar gjithashtu që në periudhën e dimrit, ngrohja përmes kondicionerit të mos i kalojë 19°C të paktën deri në nëntor të 2023.
Kryeministri i Spanjës, Pedro Sanchez lajmëroi publikisht se shtetit i duhet në mënyrë urgjente të kursejë energji, madje inkurajon punonjësit e zyrës të heqin kollaret e tyre për të qëndruar më të freskët pa ndihmën e kondicionerëve. “Unë i kam kërkuar ministrave dhe drejtuesve të sektorëve privatë dhe publikë të mos mbajnë kollare kur nuk është e nevojshme.” tha kryeministri gjatë një deklarate për shtyp.
Gjithashtu dhe Italia dhe Greqia kanë prezantuar masa të tilla për të limituar përdorimin e energjisë elektrike në godinat publike.
