Shqipëria është një ndër 61 shtetet e ndryshme që ka firmosur Deklaratën për të ardhmen e internetit, një deklaratë ku shtrohen prioritetet për “një internet të hapur, falas, global, ndërveprues, të besuar dhe të sigurt”.
Qëllimet kryesore janë përballueshmëria, neutraliteti i internetit dhe fshirja e përmbajtjeve të paligjshme pa penguar liritë themelore të njerëzve.
“Ne jemi të lidhur nga një besim mbi potencialin e teknologjive dixhitale për të promovuar ndërlidhjen, demokracinë, paqen, sundimin e ligjit dhe mbështetjes së të drejtave themelore të njeriut.” lexohet në hyrje të dokumentit. Megjithatë aksesi në internetin e lirë është limituar nga disa qeveri autoritare dhe platforma online, ndërkohë që mjetet dixhitale po përdoren për të shtypur lirinë e shprehjes dhe t’i mohojnë njerëzve të tjerë të drejtat dhe liritë themelore.
Shqipëria del në mbështetje të faktit se interneti duhet të jetë i deçentralizuar dhe i ndërlidhur globalisht, duke pranuar se “të gjithë shtetet duhet të tregohen të përmbajtur në pengimin e infrastrukturës teknike të nevojshme për aksesueshmërinë e internetit dhe integritetin e tij.”
Ky qëndrim është disi i ndryshëm nga ai i shteteve si Rusia apo Kina, të cilët kanë bllokuar aksesimin e website-ve dhe aplikacioneve të huaja. Temat si privatësia dhe siguria e internetit reflektojnë hapat që BE ka ndërmarrë gjatë viteve të fundit, duke përfshirë këtu General Data Protection Regulation dhe Digital Services Act.
