Nëse keni parë ndonjëherë një emision gatimi dhe keni dashur të shijoni ushqimin në ekran, së shpejti kjo gjë do të jetë e mundur falë avancimeve të reja teknologjike.
Studiuesit në Universitetin e Hong Kongut, kanë treguar se mund të jetë e mundur të përjetohet ndjesia e shijes në realitetin virtual. Shkencëtarët kanë zhvilluar një pajisje VR që lëpihet që mund të ofrojë një shije të krijuar në botën virtuale. Në të ardhmen, këto pajisje të çuditshme mund t’i bëjnë emisionet e gatimit si Master Chef më tërheqëse se kurrë, ndërsa shikuesit shijojnë ushqimin së bashku me shefët drejtues të emisionit.
Sistemet e transmetimit të shijes në formën e një lëpirësejanë të afta të prodhojnë deri në 9 shije të ndryshme. Aktualisht, kjo përfshin shijet e sheqerit, kripës, acidit citrik, qershisë, frut pasioni, çajit jeshil, qumështit, qitros dhe durian. Secila prej shijeve krijohet duke përdorur kimikate me shije ushqimore të ruajtura brenda qeskave me xhel agarozë – një xhel që zakonisht rrjedh nga algat e kuqe.
Kur aplikohet një tension në lëpirëse, kimikatet çlirohen në sipërfaqen e xhelit në një lëng që përzihet me pështymën në gjuhë për të prodhuar shije.
Ndërsa realiteti virtual dhe i përzier bëhen më të zakonshëm, studiuesit janë të zënë duke kërkuar mënyra për ta bërë botën tonë virtuale më gjithëpërfshirëse. Në një punim të botuar në Proceedings of the National Academy of Sciences, autori kryesor Dr Yiming Liu dhe bashkëautorët shkruajnë: “Përveç ndjesive vizuale, dëgjimore, haptike dhe nuhatjes, shija ndikon ndjeshëm si në aspektet fiziologjike ashtu edhe në psikologjike të përvojës njerëzore. Megjithatë, kërkimi në zhvillimin e teknologjive që gjenerojnë shije në aplikacionet VR është ende në fillimet e tij.“
