Me rikthimin e Sam Altman dhe Greg Brockman në pozicionet e tyre të mëparshme në kompani, OpenAI po përpiqet të rikthejë gjërat në normalitet, pas një periudhe shumë të vështirë.
Për herë të parë kompania prezantoi bisedat zanore me ChatGPT në Android dhe iOS në shtator, duke u dhënë përdoruesve mundësinë që të bisedojnë me chatbot-in nëse dëshirojnë. Kompania e bëri këtë veçori të disponueshme vetëm për abonentët e Plus dhe Enterprise në atë kohë, megjithatë premtoi se së shpejti do ta ofronte këtë shërbim dhe për përdoruesit jo të abonuar.
Tani, bashkëthemeluesi i OpenAI Greg Brockman ka njoftuar në X se bisedat zanore në ChatGPT kanë filluar të shfaqen për të gjithë përdoruesit në smartphone. Kur kompania prezantoi për herë të parë bisedat zanore, pranoi se aftësia për të krijuar “zëra sintetikë realistë nga një regjistrim prej vetëm disa sekondash” paraqet rreziqe të reja. Për shembull, mund të lejojë keqdashësit të imitojnë figura publike ose këdo që duan.
Si rezultat, OpenAI vendosi që funksioni zanor i ChatGPT të fokusohet në bisedimin me chatbot. Ky shërbim fuqizohet nga një model text-to-speech që mund të gjenerojë “audio të ngjashme me njeriun nga vetëm teksti dhe një shembull prej disa sekondash të të folurit“. OpenAI ka punuar me aktorët e zërit për të krijuar këtë shërbim dhe ofron pesë zëra të ndryshëm për të zgjedhur.
Si fillim voice chats duket se janë përhapur në pajisjet iOS, megjithatë së shpejti do të jetë i pranishëm në të gjitha pajisjet dhe llogaritë.
