OpenAI ka vendosur të krijojë një aplikacion për iOS, i cili do të fuqizohet nga chatbot-i mjaft i njohur ChatGPT për të ndihmuar përdoruesit me përgjigje për kërkesat e tyre. Aplikacioni do të përdorë një ndërfaqje të ngjashme me iMessage, siç mund të shikohet nga një version demo të shpërndarë në LinkedIn.
ChatGPT u lançua në nëntorin e vitit të kaluar dhe tërhoqi vëmendjen e shumë përdoruesve falë aftësive që ka në zgjidhjen e kërkesave komplekse nëpërmjet tekstit të shkruar. Algoritmi që fuqizon këtë chatbot, GPT3.5, është krijuar nga Open AI dhe është trajnuar për të mësuar se çfarë nënkuptojnë njerëzit kur bëjnë një pyetje. Këto aftësi e shndërrojnë ChatGPT në një rrezik kryesor për biznesin e Google Search.
Jason Calacanis, një biznesmen dhe investitor, i njohur kryesisht si një ndër njerëzit më të afërt me Elon Musk në Twitter, tregon se aplikacioni i OpenAI ofron momentalisht një opsion kërkimi dhe një histori ku mund të shikohen të gjitha kërkesat e bëra.
Këto shërbime mund të ndihmojnë në të ardhmen të gjithë përdoruesit që mund të ruajnë bisedat e tyre me ChatGPT dhe t’i aksesojnë nëpërmjet aplikacionit në smartphone. Përdoruesit nuk do të duhet të mbajnë mend se cilat ishin fjalët kyçe që kishin përdorur për të gjeneruar një përgjigje të caktuar.
Pas këtij suksesi kaq të madh të OpenAI, e cila filloi si një organizatë jofitimprurëse, Microsoft po mendon të investojë $10 miliardë, ndërkohë që aktualisht OpenAI vlen $29 miliardë.
