Mekanizmi rrotullues ishte një shërbim unik që i bënte të veçanta orat smart Galaxy, mirëpo kompania vendosi që të mos e përfshinte një mekanizëm të tillë në serinë Galaxy Watch 5.
Megjithatë leaker-i korean Super Roader tregon se Samsung Galaxy Watch 6 Pro do të rikthejë mekanizmin rrotullues dhe do t’i japë një mundësi përmirësimi të gjithë personave që vendosën të mbajnë modelet Classic të mëparshëm.
Vetëm modeli Pro do të sjellë këtë mekanizëm, ndërkohë që modeli bazë Watch 6 do të ketë thjesht një ekran dixhital. Ka një tjetër lajm të mirë për të gjithë personat që mendonin se Galaxy Watch 5 Pro ishte shumë i madh për kyçin e tyre (pasi vinte vetëm në një madhësi 45.5mm): Galaxy Watch 6 Pro do të vijë në 2 madhësi, megjithatë ende nuk është e ditur se cilat do të jenë këto madhësi.
Pritet që të ketë të tjera përmirësime në serinë e Galaxy Watch 6. Bateria e Watch 6 mund të ketë një kapacitet 5% më të madh, nga 284mAh në 300mAh. Pritet që dhe versioni Pro të ketë një rritje në kapacitetin e baterisë.
Me shumë mundësi gjenerata e re e orave smart Galaxy do të prezantohet në gusht së bashku me gjeneratën e re të pajisjeve të palosshme.
