Samsung sapo nxorri në treg gjeneratën e tretë të smartphone-ve të palosshëm Z Fold 3 dhe Z Flip 3, dhe ka nisur nga puna për krijimin e një pajisjeje tjetër e cila do të paloset 2 herë.
Aktualisht ky prototip me dy palosje gjendet në IMID 2021 (International Meeting for Information Displays), dhe për të gjithë personat që nuk mund të gjenden atje në YouTube është publikuar një video e shkurtër prezantimi për këtë smartphone.
Për fat të keq në këtë video nuk shfaqet proçesi i mbylljes dhe hapjes së pajisjes, megjithatë duket qartë përdorimi i të njejtit dizajn me pajisjet Galaxy Z Fold. Nëse ju e mbani mend në muajin maj, Samsung tregoi dhe një pajisje të ngjashme që nuk funksiononte në të vërtetë por thjesht tregonte formën që smartphone-i do të kishte.
Mund të konsiderohet një progres i vërtetë krijimi i një pajisjeje funksionale në një periudhë kaq të shkurtër. Samsung ka vendosur ta quajë këtë teknologji “multi-foldable” dhe i referohet këtij produkti specifikisht si Samsung Flex In & Out. Me shumë mundësi ky nuk do të jetë emri përfundimtar me të cilin pajisja do të prezantohet në treg, por nuk është nevoja të shqetësoheni kaq herët pasi ky produkt duket të jetë shumë larg prodhimit në masë.
