Së shpejti Samsung mund të reduktojë faturën e riparimit për të gjithë përdoruesit e smartphone-ve të prodhuar nga kjo kompani, falë planit për të ofruar pjesë të ricikluara për riparimin e hardware-it.
Business Korea raporton se gjigandi i teknologjisë po planifikon të implementojë një program ku do të ofrojë pjesë riparimi të çertifikuara së bashku me komponentët e rinj. Nuk është ende e qartë nëse pjesët e riparuara do të mund të blihen në mënyrë të drejtpërdrejtë nga klientët apo do të ofrohen vetëm në dyqanet e riparimit të Samsung.
Me shumë mundësi këto komponentë do të nisin të ofrohen duke filluar nga gjysma e dytë e këtij viti. Në raportimin e mësipërm flitet posaçërisht për smartphone-t, pra kur vjen puna tek tabletët apo laptopët Samsung, do të nevojiten më tepër informacione për të kuptuar nëse bëjnë pjesë në këtë program.
Kjo përpjekje e Samsung jo vetëm që do të reduktojë koston e riparimit të pajisjeve për konsumatorët, por kontribuon dhe strategjinë e kompanisë për të ulur sasinë e mbetjeve elektronike.
Samsung tregoi se disa nga komponentët e përdorur në Galaxy S22 janë të krijuara nga rrjetat e peshkimit të ricikluara, duke qenë akoma më miqësore me mjedisin.
