Pamjet 3D të orave smart nga Samsung që pritet të publikohen pas një muaji, Galaxy Watch 5 dhe Galaxy Watch 5 Pro, po bëjnë xhiron e internetit pas publikimit nga Evan Blass dhe 91Mobiles.
Galaxy Watch 5 Pro do të jetë pasardhësi i Galaxy Watch 4 Classic, pra versioni më premium i dy orave smart. Lajmi i keq është se raportimet që tregonin se orat smart Galaxy nuk do të kenë një unazë të rrotullueshme duket të jenë të vërteta, pasi në këto imazhe kjo unazë rrotulluese nuk duket në asnjë version të orës.
Një tjetër ndryshim që duket të vijë këtë vit është në madhësinë e Watch 5 Pro, e cila pritet të vijë vetëm në madhësinë 45mm, ndryshe nga viti i kaluar ku ofroheshin dy madhësi, 44 dhe 46mm.
Në anën tjetër kemi dhe orën standarde Galaxy Watch 5, me një dizajn më të thjeshtë. Kjo orë do të vijë në dy madhësi, 44mm dhe një madhësi më e vogël jo e specifikuar.
Të dyja orat smart do të kenë disa butona fizikë në anën e djathtë të ekranit, opsion për lidhje LTE, mbështetje për GPS dhe rezistencë ndaj ujit deri në 5ATM, pra ato mund të mbijetojnë në thellësi 50 metra për 10 minuta.
Për sa i përket software-it, Blass raporton se të dyja orat do të navigojnë në WearOS 3.5, të cilës i është mbivendosur One UI Watch 4.5. Një raportim i mëparshëm tregon se orat do të mund të karikohen shpejt me karikuesen 10W, një përmirësim krahasuar me karikuesen e mëparshme 5W.
