Qualcomm ka prezantuar procesorin më të ri Snapdragon 8 Elite Gen 5, që kompania e quan “më i shpejti në botë” për smartphone. Ky çip është krijuar për pajisje flagship të prodhuesve që nuk zhvillojnë procesorët e tyre dhe pritet të shfaqet në modelet e para gjatë ditëve në vijim. Bëhet fjalë për një përmirësim të madh krahasuar me gjeneratën e mëparshme, duke u mbështetur te CPU Oryon i gjeneratës së tretë.
Qualcomm deklaron se Oryon ofron 20% më shumë performancë dhe 35% efikasitet më të lartë në konsum energjie, ndërsa platforma në tërësi shënon një ulje prej 16% të konsumit, duke lejuar performancë të qëndrueshme për periudha më të gjata. Këto risi mundësojnë hapje më të shpejtë mes aplikacioneve, për një multitasking të rrjedhshëm.
Një element i veçantë është përfshirja e AI Engine të përmirësuar, me procesorin neural Hexagon NPU që është 37% më i shpejtë. Kjo u jep pajisjeve mundësinë të përpunojnë inteligjencë artificiale brenda telefonit, duke krijuar agjentë personalë që “shohin, dëgjojnë dhe mendojnë” në kohë reale, sipas menaxherit të lartë të Qualcomm, Chris Patrick.
Snapdragon 8 Elite Gen 5 është gjithashtu platforma e parë mobile që mbështet regjistrim me kodimin Advanced Professional Video (APV), duke i lejuar krijuesit të realizojnë xhirime me cilësi profesionale direkt nga telefoni.
Shumë marka të njohura kanë konfirmuar përdorimin e këtij SoC në modelet e tyre të ardhshme flagship, mes tyre Samsung, OnePlus, OPPO, Honor, iQOO, Nubia, POCO, realme, REDMI, RedMagic, ROG, Sony, vivo, Xiaomi dhe ZTE. Me këtë çip, Qualcomm synon të vendosë një standard të ri për shpejtësinë, efikasitetin dhe aftësitë e inteligjencës artificiale në pajisjet mobile të nivelit të lartë.
