Shpesh herë në internet koncepte infrastrukturash jo të zakonshme të dizenjuara nga studentët në kohën e lirë shndërrohen në postime virale. Mirëpo kësaj here një dizajn i tillë i cili po bën xhiron e rrjeteve sociale është i mbështetur nga një ndër qeveritë më të pasura në botë, Arabisë Saudite.
Me sa duket ky shtet ka në plan të ndërtojë një qytet që duket si një “mur i madh pasqyrë” në shkretëtirë. Princi trashëgimtar Mohammed bin Salman dëshiron të zhvillojë një qytet të madh në shkretëtirë të quajtur Neom, në të cilin do të përfshihet teknologjia më futuristike që ju mund të mendoni.
E gjithë kjo gjë është kritikuar nga shumë persona të cilët nuk janë dakord me këtë shpenzim gjigand. Megjithatë Mohammed bin Salman i ka deklaruar këto projekte si “piramidat e tij”. Dizajni i The Line (qytetit vertikal) tregon se ndërtesa do të jetë 500 metra e lartë, 170 kilometra e gjatë dhe do të jetë tërësisht e mbuluar në pasqyra.
Dhe pse duket si një mur, The Line supozohet të konsistojë në dy ndërtesa paralele gjigande, të cilat do të lidhen me njëra-tjetrën përmes rrugëve dhe do të ndahen në lagjje që do të plotësojnë të gjitha komoditetet e jetës së qytetit në një distancë ecjeje prej 5 minutash.
Në këtë qytet perimet do të “korren dhe paketohen automatikisht” në fermat e komunitetit, dhe një tren me shpejtësi të lartë do të lëvizë nën ndërtesat me pasqyra.
