Ndërkohë që Neuralink e Elon Musk pret të nisë testimin e produkteve tek njerëzit pas 6 muajsh, një tjetër kompani ka prezantuar një pajisje që trajton depresionin dhe aktualisht gjendet në trurin e një pacienti.
Inner Cosmos ka prezantuar një metodë trajtimi të depresionit që konsiston në dy pjesë: një elektrodë që vendoset nën lëkurën e skalpit dhe një tjetër pajisje që vendoset në flokët e pacientit për t’i dhënë energji pajisjes.
Implanti i dërgon pulse të vogla elektrike trurit në zonën e prekur nga depresioni, në korteksin dorsolateral prefrontal të majtë, një herë në ditë për 15 minuta. Pajisja e jashtme nuk ka nevojë të mbahet në flokët e pacientit gjatë kohës që trajtimi nuk po administrohet.
Pacienti i cili po teston këtë pajisje është nga Missouri dhe do të shikojë rezultatet e inovacionit të Inner Cosmos pas një viti. Implantet të cilat trajtojnë të gjitha zonat e trurit po bëjnë shumë zhurmë në industri, pasi janë në një garë për të nxjerrë në treg produktin e parë të aprovuar.
Megjithatë, për momentin produkti i Inner Cosmos është më i vogli ndërmjet të gjithë produkteve të tjera. Implantimi i elektrodës nën skalp bëhet brenda 30 minutash.
Kompania Inner Cosmos është themeluar nga Meron Gribetz, i cili ishte diagnostikuar me çrregullime të vëmendjes. “Qëllimi ynë është të krijojmë një botë ku rikthehet fuqia kongintive e humanëve duke ribalancuar mendjen tonë. Ne besojmë se metoda që përdorim mund të lehtësojë jetën e pacientëve që vuajnë nga depresioni, si dhe më pas të trajtojmë sëmundje të tjera.”
