Përmbajtjet ekskluzive në një platformë të caktuar janë mënyra më e mirë për të rritur shitjet e hardware-ve të ndryshme, dhe Kanye West po shfrytëzon këtë strategji për të rritur shitjet e Stem Player.
Ai lajmëroi se albumi i tij i ri “Donda 2” do të mund të dëgjohet vetëm në këtë platformë, dhe jo në Apple Music, Amazon, Spotify apo YouTube. Ye tregon se arsyeja se përse ai mori këtë vendim është se “artistët sot përfitojnë vetëm 12% të parave që industria prodhon”.
“Është koha që të çlirojmë muzikën nga ky sistem shtypës. Është koha që të rimarrim kontrollin dhe të krijojmë sistemin tonë. Shkoni në stemplayer.com për të porositur pajisjen tuaj.” tha West në një postim në Instagram. Albumi Donda 2 pritet të lançohet në 22 shkurt, por Kanye është mjaft i njohur për mosrespektimin e datave të paralajmëruara për lançimin e projekteve të reja muzikore.
Për të gjithë personat e interesuar në blerjen e një Stem Player, kjo pajisje do të kushtojë $200. Përmes saj ju do të mund të manipuloni pjesë të ndryshme të këngëve që dëgjoni duke përdorur slider-at touch-sensitive që gjenden në këtë pajisje. Stem Player ka 8GB internal storage dhe mund të lidhet me pajisjet e tjera përmes USB-C, Bluetooth apo 3.5mm headphone jack.
