“Horizon World” u hap për publikun para disa javësh, dhe për një kohë kaq të shkurtër u raportua rasti i parë i ngacmimit seksual në metaverse. Kjo gjë tregon se siguria e përshkruar në botët virtuale nuk është e pacënueshme dhe lë vend për shumë diskutime.
Në këtë hapësirë virtuale njerëzit kanë mundësi të qëndrojnë së bashku në një grup prej 20 përdoruesish njëkohësisht. Meta është në dijeni të këtij ngacmimi seksual, pasi kjo gjë u bë e ditur kur gruaja e bëri publike eksperiencën e saj në grupin testues të Horizon World beta në Facebook.
Pas investigimeve Meta tregoi se viktima mund të kishte përdorur një mjet të quajtur “Safe Zone” që është pjesë e shërbimeve të sigurisë në Horizon World. Brenda kësaj Safe Zone askush nuk mund të prekë individualisht avataret dixhitale individuale. Në këtë shërbim gjenden dhe disa kufizime mbi ndërveprimin midis lojtarëve.
Në bisedat me The Verge, zëvëndës presidenti i Horizon World, Vivek Sharma, e quajti këtë incident “absolutisht për të ardhur keq”. Ky incident shpreh problemet që ka bota virtuale, pasi të njejtat gjëra që ndodhin në botën reale tentojnë të ndodhin dhe në atë virtuale. Kompanitë teknologjike duhet të marrin masa më të rrepta për të shmangur krijimin e një eksperience të keqe në metaverse.
