NASA dhe Defense Advanced Research Projects Agency (DARPA) lajmëruan ditën e martë se do të bashkëpunojnë për të krijuar një motor me energji bërthamore termale, duke mundësuar kështu udhëtimin e astronautëve të NASA në drejtim të Marsit.
Programi DRACO do të sjellë përfitime për të dyja agjencitë, duke arritur në rezultatin e dëshiruar në një kohë më të shkurtër.
“NASA do të bashkëpunojë me partnerin e vjetër DARPA për zhvillimin dhe demonstrimin e teknologjisë shtytëse termike bërthamore në vitin 2027. Me ndihmën e kësaj teknologjie, astronatutët mund të udhëtojnë drejt hapësirës më shpejt se kurrë, duke na përgatitur kështu për misionet drejt planetit Mars.” tha administratori i NASA, Bill Nelson.
Përdorimi i motorit me energji bërthamore termale do të mundësojë uljen e periudhës tranzitore, duke reduktuar kështu riskun e astronautëve. Ulja e kohës së transportimit të astronautëve drejt planetëve të tjerë është një komponent kryesor i misioneve të udhëtimit drejt Marsit, pasi udhëtimet e gjata kërkojnë më tepër rezerva dhe sisteme të fuqishme.
Përfitime të tjera nga kjo teknologji janë dhe fuqia më e lartë nxitëse si dhe aftësia e komunikimit në distance më të mëdha. Njëkohësisht raketat me energji bërthamore termale mund të jenë deri në 3 herë më efiçiente se sistemet që përdoren në ditët e sotme.
