Eksperimenti i parë për të prodhuar oksigjen në Mars ka përfunduar pasi ka tejkaluar qëllimet fillestare të NASA-s dhe demonstruar aftësi që mund të ndihmojnë astronautët e ardhshëm të eksplorojnë Planetin e Kuq. Pajisja me madhësi sa një mikrovalë e quajtur MOXIE, ose Mars Oxygen In-Situ Resource Utilization Experiment, është i integruar në roverin Perseverance.
Eksperimenti filloi më shumë se dy vjet më parë, disa muaj pasi roveri u ul në Mars. Që atëherë, MOXIE ka prodhuar 122 gram oksigjen (që mund të konsumohet nga një qen i vogël për 10 orë), sipas NASA-s.
Gjatë kulmit të efikasitetit të tij, MOXIE prodhoi 12 gram oksigjen në orë me pastërti 98% ose më mirë, që është dy herë më tepër se objektivat e NASA-s për pajisjen. Më 7 gusht, MOXIE operoi për herë të 16-të dhe të fundit, pasi kishte plotësuar të gjitha kërkesat e saj. “Ne jemi krenarë që kemi mbështetur një teknologji të re si MOXIE që mund t’i kthejë burimet lokale në produkte të dobishme për misionet e ardhshme të eksplorimit,” tha Trudy Kortes, drejtor i demonstrimeve të teknologjisë, Drejtoria e Misionit të Teknologjisë Hapësinore në selinë e NASA-s, në një deklaratë. “Duke provuar këtë teknologji në kushte të botës reale, ne kemi hedhur një hap më afër një të ardhmeje në të cilën astronautët ‘do të jetojnë jashtë tokës’ në Planetin e Kuq.”
MOXIE arrin të prodhojë oksigjen duke ndarë molekulat e dioksidit të karbonit që përmban një atom karbon dhe 2 oksigjen. Ai ndan molekulat e oksigjenit dhe lëshon monoksid karboni si një produkt të panevojshëm. Ndërsa gazrat lëvizin nëpër instrument, sistemi i tij analizon pastërtinë dhe sasinë e oksigjenit.
Materialet që e tolerojnë nxehtësinë, si një shtresë ari dhe aerogel, u përdorën për prodhimin e instrumentit pasi proçesi i konvertimit kërkon temperatura që arrijnë 798 gradë Celsius. Këto materiale e ruajtën nxehtësinë që të mos dëmtonte çdo aspekt të roverit.
