Meta ka zhvilluar një byzylyk prototip që i lejon përdoruesit të kontrollojnë pajisjet digjitale, si laptopët dhe telefonat, vetëm me lëvizje të dorës. Pajisja duket si një orë e madhe drejtkëndëshe dhe përdor elektromiografinë (EMG) për të kapur sinjale elektrike nga muskujt e parakrahut. Këto sinjale shkaktohen nga komandat e trurit, shpesh përpara se të ndodhë ndonjë lëvizje e dukshme. Me këtë teknologji, mund të lëvizësh kursorin, hapësh aplikacione dhe të shkruash në ajër me lëvizje të vogla ose dhe nëpërmjet mendimit të kryerjes së një lëvizje.
Ndryshe nga teknologjitë invazive si ato të Neuralink apo Synchron, qasja e Metës nuk kërkon ndërhyrje kirurgjikale. Byzylyku përdor inteligjencën artificiale për të interpretuar sinjalet e muskujve. Pas mbledhjes së të dhënave nga mbi 10,000 persona, Meta trajnoi një rrjet nervor për të identifikuar modele universale, duke e bërë pajisjen të funksionojë menjëherë edhe me përdorues të rinj.
Teknologjia u zhvillua fillimisht nga Ctrl Labs, e blerë nga Meta në vitin 2019, dhe synon të revolucionarizojë ndërveprimin mes njerëzve dhe kompjuterëve. Ajo gjithashtu mund të ndihmojë shumë persona me aftësi të kufizuara, si ata me dëmtime në shtyllën kurrizore, të cilët mund të aktivizojnë disa fibra muskulore dhe kështu të përdorin pajisje që ndryshe nuk do t’i përdornin dot.
Teknologjia ndërtohet mbi përpjekje të mëparshme si rripi Myo nga Thalmic Labs, i cili dështoi për shkak të kufizimeve. Por versioni i Metës ka arritur një nivel më të lartë falë machine-learning dhe të dhënave masive. Meta planifikon ta integrojë këtë teknologji në produkte si syzet inteligjente në vitet në vijim.
