Pas një viti të mbushur me polemika për përdorimin e inteligjencës artificiale në platformat e saj, Meta ka njoftuar masa të reja për të kontrolluar mënyrën se si adoleshentët ndërveprojnë me chatbotët AI. Qëllimi është të forcohen kontrollet prindërore dhe të rindërtohet imazhi publik i kompanisë, pas raporteve shqetësuese mbi ndërveprimet e papërshtatshme mes chatbots dhe të miturve.
Sipas një publikimi nga drejtuesit Adam Mosseri dhe Alexandr Wang, prindërit do të kenë mundësi të ndalojnë plotësisht përdorimin e chatbotëve nga fëmijët e tyre ose të bllokojnë personazhe specifike që i konsiderojnë të papërshtatshme. Një përjashtim do të mbetet asistenti zyrtar i Meta AI, i cili do të vazhdojë të ofrojë informacione dhe ndihmë arsimore “me mbrojtje të përshtatura sipas moshës”.
Kompania po ashtu do t’u japë prindërve një pasqyrë të përgjithshme mbi mënyrën se si fëmijët e tyre po përdorin chatbotët, përfshirë temat më të shpeshta të bisedave. Meta thotë se kjo synon t’i ndihmojë prindërit të zhvillojnë “biseda të menduara me adoleshentët për ndërveprimet me AI”.
Megjithatë, mjetet e reja të kontrollit prindëror nuk do të jenë menjëherë të disponueshme. Ato do të vijnë në fillim të vitit 2026 dhe fillimisht vetëm në Instagram, për përdoruesit anglishtfolës në SHBA, Britani, Kanada dhe Australi. Meta premton se do t’i zgjerojë funksionet edhe në platformat e tjera të saj, përfshirë Facebook dhe WhatsApp, në një fazë të dytë.
Ky është përditësimi më i rëndësishëm i sigurisë që Meta ka bërë për chatbots të saj që nga prezantimi i tyre në të gjitha aplikacionet kryesore. Masa vjen menjëherë pas një tjetër ndryshimi të madh që kufizon përmbajtjen që mund të shohin përdoruesit e rinj në Instagram, duke e përafruar atë me standardet e një filmi PG-13.
