Para disa vitesh, shumica e smartphone-ve vinin me një bateri që mund të zëvëndësohej lehtësisht. Ne nuk kishim nevojë për asnjë aparaturë për të hequr pjesën e pasme plastike, e cila na jepte akses të menjëhershëm të baterisë. Mjafton të nxirrje jashtë baterinë dhe të vendosje baterinë e re.
Mirëpo ditët e sotme smartphone-t janë bërë gjithnjë e më të vështirë për t’u riparuar, dhe për të zëvëndësuar baterinë e vjetër me një të re duhet t’i drejtoheni profesionistëve të riparimit.
Me sa duket Parlamentit Evropian nuk i pëlqen shumë ky ndryshim i bërë në smartphone, dhe së shpejti falë një projektligji të ri mund të detyrojë prodhuesit e smartphone-ve që të lehtësojnë proçesin e zëvëndësimit të baterisë. 589 anëtarë të Parlamentit Evropian votuan në favor të vendimit që të gjitha pajisjet elektronike të kenë një bateri lehtësisht të zëvëndësueshme.
Me termin “lehtësisht të zëvëndësueshme” nënkuptohet që të mos nevojiten pajisje ekstra për të aksesuar baterinë. Prandaj, shumë nga pajisjet e reja mund të mos kenë material adeziv në to.
Prodhuesit e mëdhenj të smartphone-ve si Samsung apo Apple do të duhet të ndryshojnë dizajnin e pajisjeve në mënyrë drastike. Megjithatë ky ndryshim nuk do të ndodhë menjëherë, pasi kompanitë do të kenë kohë deri në vitin 2027 që të përshtaten me ligjet e reja të Bashkimit Evropian.
