Më herët gjatë këtij viti, një bashkëpunim midis University of Tokyo dhe Mercari R4D bëri të mundur krijimin e Poimo, një skuter elektrik i butë i cili mund të fryhet me ajër. Ekipi kreativ, me qëllim ridefinimin e kombinimit të lëvizshmërisë personale me robotikën e butë, është rikthyer me një tjetër version të skuterit i cili mund t’i përshtatet trupit të përdoruesit dhe të drejtohet plot stil.
Poimo jo vetëm që përfshin formën e një skuteri elektrik, por mund të transformohet dhe në një tip të ngjashëm manual të karrigeve me rrota. Me karakteristikat si i lehtë, i butë, i shfryrë dhe i palosshëm, Poimo krijon një koncept të ri të lëvizshmërisë personale, e cila përfiton nga përshtatja e personalizuar për çdo individ dhe kontribuon në arritjen e një sistemi transportimi sipas nevojave të përdoruesve.
“Edhe nëse ju nuk jeni një ekspert, ju mund të dizenjoni lehtësisht lëvizshmërinë personale që i përshtatet fizikut të gjithësecilit prej jush thjesht duke shkrepur një pozë që imagjinon pajisjen që ju duhet të përdorni përmes software-it të dedikuar.” tregon Poimo.
Ky dizajn i ri konsideron dhe mënyrën e menaxhimit të produktit, si përshembull transportimi i tij dhe hapësira që zë në shtëpinë tuaj. Skuteri mund të fryhet në madhësinë e një motori normal apo një karrigeje me rrota, dhe mund të ruhet në mënyrë kompakte pasi të jetë shfryrë dhe palosur.
Për të parën herë, skuteri elektrik do të ekspozohet përpara publikut të gjerë dhe medias në edicionin e gjashtë të VivaTech 2022. Geek Room dhe Vodafone do ta ndjekin nga afër dhe pse jo, do të provojnë të jenë ndër të parët që do të testojnë këtë risi në levizshmëri. Na ndiqni nga data 16 deri në 18 qershor 2022.
