Më tepër se 12 milionë njerëz në botë janë të verbër për shkak të problemeve me kornenë e syrit, ku shtresa mbrojtëse deformohet nga sëmundje të tjera. Për shkak se transplanti i kornesë kërkon një dhurues human, vetëm një person nga 70 në nevojë merr një transplant të tillë.
Mehrdad Rafat së bashku me kolegët e tij në Linköping University në Suedi arritën të krijonin një strukturë fleksibël dhe elastike, e cila i ngjan lentes së kontaktit, duke përdorur kolagjenin e gjetur në lëkurën e derrit. Pas testimeve të suksesshme të këtij eksperimenti, ekipi filloi të testonte kornenë artificiale në disa vullnetarë.
20 njerëzit që morën pjesë në testime ishin të prekur nga sëmundja e keratokonus, 14 prej të cilëve ishin tërësisht të verbër ndërsa 6 të tjerët me shikim të dëmtuar. Pas kryerjes së ndërhyrjes, të gjithë personat raportuan për përmirësim në shikim. Në 3 pacientë ish-të verbër u vu re se shikimi ishte rikthyer në gjendjen më të mirë të mundshme.
“Mbaj mend herën e parë që njëri nga implantet do të vendosej në sytë e pacientëve. Nuk mund të flija, qëndrova zgjuar gjithë natën duke pritur që kirurgu të më tregonte se gjithçka kishte shkuar mirë. Kur mora vesh se shikimi ishte rikthyer ishte një moment tepër i mrekullueshëm. Ne morëm rezultate shumë më të mira se ato që prisnim.” tha Rafat.
