Një zbulim i ri ka tronditur botën e teknologjisë: kompania londineze Builder.ai, e vlerësuar në 1.5 miliardë dollarë dhe e mbështetur nga Microsoft, është mbyllur pasi u zbulua si një mashtrim i mirëorganizuar. Kompania pretendonte se sistemi i saj “AI”, i quajtur “Natasha”, mund të krijonte aplikacione në mënyrë të automatizuar – nga dizajni deri te kodi në kohë rekord. Por, në realitet, pas “rrjetit nervor” qëndronin mbi 700 inxhinierë nga India.
Microsoft kishte investuar $455 milionë duke besuar se kompania kishte zhvilluar teknologji të avancuar AI. Në fakt, shumica e punës kryhej manualisht nga njerëzit, me ndihmë minimale nga softueri. Mashtrimi zgjati 8 vite dhe u zbulua në maj 2025. Më pas, kompania njoftoi në LinkedIn se do të hynte në procedura të falimentimit, duke fajësuar vendimet e gabuara të së kaluarës dhe problemet financiare.
Skandali u thellua më tej kur dokumente të shqyrtuara nga Bloomberg zbuluan se Builder.ai kishte bashkëpunuar me një kompani tjetër indiane, VerSe, për të fryrë të ardhurat në mënyrë të rreme. Nga viti 2021 deri në 2024, ato i faturonin njëra-tjetrës shuma të ngjashme për shërbime që nuk ishin kryer. VerSe i ka mohuar këto akuza, duke i quajtur “të pabaza dhe të pavërteta”.
Rasti ka shkaktuar përhapje të madhe në rrjetet sociale. Madje, një kompani tjetër e quajtur Builder.io – e pavarur nga ngjarja – është ngatërruar nga publiku. CEO i saj është detyruar të sqarojë publikisht se nuk ka lidhje me Builder.ai, në një postim që është bërë viral me reagime plot humor.
Ky rast thekson rrezikun e investimeve të nxitura nga zhurma mediatike dhe nevojën për verifikim serioz në industrinë e inteligjencës artificiale.
