Kina po konsolidon epërsinë globale në prodhim duke përshpejtuar prodhimin dhe përdorimin e robotëve industrialë me ritme që asnjë vend tjetër nuk i afrohet. Sipas Federatës Ndërkombëtare të Robotikës, vitin e kaluar në fabrikat kineze punonin mbi dy milion robotë dhe u instaluan gati 300 mijë të rinj – më shumë se pjesa tjetër e botës së bashku. Për krahasim, SHBA instaloi vetëm 34 mijë dhe Japonia 44 mijë. Në total, Kina ka 5 herë më shumë robotë fabrikash se SHBA.
Kjo arritje vjen pas një strategjie shumëvjeçare shtetërore. Që nga fushata “Made in China 2025”, qeveria ka ofruar kredi të lira dhe financime direkte, duke nxitur zhvillimin e kompanive vendase të robotikës, ashtu si në industrinë e makinave elektrike dhe inteligjencës artificiale. Që prej 2017-ës, fabrikat kineze instalojnë mbi 150 mijë robotë çdo vit, duke e çuar vendin të prodhojë gati një të tretën e mallrave industrialë të botës.
Një tjetër tregues i progresit është kalimi nga importet te prodhimi vendas: për herë të parë, vitin e kaluar rreth 60% e robotëve të rinj në Kinë ishin prodhim kombëtar. Pjesa e Kinës në prodhimin botëror të robotëve u rrit në një të tretën, duke kaluar Japoninë që ra në 29%. Ndërkohë, vendi ka krijuar një ekosistem të gjerë start-up-esh, përfshirë zhvillues të robotëve humanoidë si Unitree Robotics, e cila planifikon të dalë në bursë.
Megjithatë, Kina ende mbetet pas në komponentë të avancuar për robotët humanoidë, si sensorë dhe disa lloje çipesh, që prodhohen kryesisht në Gjermani e Japoni. Për robotët industrialë, avantazhet janë të mëdha: fuqi punëtore e kualifikuar, specialistë të instalimit me paga deri 60 mijë dollarë dhe një industri të fuqishme të inteligjencës artificiale që monitoron performancën e çdo makinerie. Kjo kombinon teknologjinë dhe strategjinë shtetërore, duke e bërë Kinën lider të padiskutueshëm të automatizimit fabrikor.
