Google I/O është një ndër eventet më interesante për të gjithë fansat e Android dhe smartphone-ve Pixel. Eventi i këtij viti, që do të organizohet në datën 10 maj, do të jetë i mbushur plot me surpriza në hardware dhe software.
Më poshtë do të listojmë produktet që pritet të prezantohen gjatë Google I/O 2023:
Google Pixel Tablet
Teknikisht Pixel Tablet është e vetmja pajisje që është konfirmuar se do të prezantohet gjatë Google I/O 2023. Kompania shfaqi disa fotografi të tabletit gjatë eventit të prezantimit të smartphone-ve Pixel, megjithatë jo shumë informacione janë bërë publike rreth kësaj pajisje.
Kur Pixel Tablet vendoset në vendin e karikimit do të funksionojë si një Nest Hub, duke shfaqur informacione të përgjithshme. Veçse kësaj here tableti do të ketë sistem operativ Android 13 dhe jo Fuchsia.
Google Pixel 7a
Google Pixel 6a u prezantua gjatë vitit të kaluar në eventin Google I/O, dhe me shumë mundësi e njejta gjë do të ndodhë dhe këtë vit. Smartphone-i do të pajiset me një ekran OLED 90Hz refresh rate, kamera kryesore me rezolucion të lartë dhe proçesorin e ri Tensor G2 të zhvilluar nga vetë Google.
Google Pixel Fold
Prej shumë kohësh është përfolur lançimi i kësaj pajisje të palosshme, megjithatë falë informacioneve të bëra leak ne dimë mjaftueshëm rreth Pixel Fold. Pritet që kjo pajisje të ketë një ekran të brendshëm 7.6” me rezolucion QHD+, refresh rate 120Hz dhe do të fuqizohet nga proçesori Tensor G2.
Pamje të serisë Pixel 8
Mendohet se smartphone-t e serisë Google Pixel 8 do të vijë me ekrane më të vogla, 5.8” për Pixel 8 dhe 6.5” për Pixel 8 Pro dhe kënde më të rrumbullakosura. Nga renders të publikuara në internet mund të shikojmë një sensor pranë kamerave, i cili mund të jetë një LiDAR.
Android 14
Android 14 është prej disa muajsh në fazën Developer Preview, dhe deri në datën 10 maj versioni më i ri i sistemit operativ pritet të jetë në fazën e testimit beta. Mezi po presim të shikojmë se cilat do të jenë ndryshimet më të reja, përveç atyre që janë lajmëruar deri më tani.
Shumë AI
Inteligjenca artificiale është tema e momentit, me ChatGPT që po ndërhyn në çdo fushë të jetës sonë. Google po përgatit që të lançojë versionin e saj të AI të quajtur Bard, që do të jetë një konkurent i drejtpërdrejtë i ChatGPT.
