Një smartphone i kontrabanduar jashtë Koresë së Veriut po ofron një pamje të rrallë dhe shqetësuese mbi nivelin ekstrem të kontrollit që regjimi i Kim Jong Un ushtron mbi qytetarët e vet – deri edhe te fjalët që ata shkruajnë.
Në pamje të parë, telefoni duket si çdo smartphone modern, por softueri i tij zbulon një realitet shtypës. Në një video të publikuar nga BBC, shikohet se telefoni ndizet me një flamur të animuar të Koresë së Veriut. Edhe pse marka nuk u përmend, dizajni ngjasonte me pajisjet Huawei ose Honor, të cilat, nëse shiten zyrtarisht në vend, janë përshtatur me softuer të miratuar nga shteti për censurë dhe mbikëqyrje.
Një nga funksionet më tronditëse ishte censurimi automatik i fjalëve të ndaluara. Kur përdoruesit shkruanin fjalën koreano-jugore oppa (që do të thotë vëlla i madh apo i dashur), ajo zëvendësohej automatikisht me “shok“, dhe shfaqej një paralajmërim se “oppa” mund të përdoret vetëm për vëllain biologjik. Termi “Koreja e Jugut” zëvendësohej gjithashtu automatikisht në “shtet kukull”.
Më shqetësues ishte funksioni që bënte screenshot çdo 5 minuta, duke i ruajtur në një dosje të fshehur, të paarritshme nga përdoruesi – të cilat autoritetet mund t’i kontrollonin më pas për të gjurmuar aktivitetin personal.
Telefoni u kontrabandua nga “Daily NK”, një media me bazë në Seul, dhe analizat konfirmuan se këto mekanizma censurimi janë të integruar thellë në softuer. Ekspertët besojnë se kjo teknologji përdoret për të përforcuar propagandën shtetërore në nivelin më personal.
Edhe pse përdorimi i smartphone-ve është rritur në Korenë e Veriut, qasja në internetin global është e ndaluar dhe survejimi është i gjithanshëm. Regjimi është përqendruar në eliminimin e ndikimit kulturor të Koresë së Jugut dhe përdor “skuadra rinore” për të kontrolluar telefonat e të rinjve në rrugë.
