Një person i paralizuar ka arritur të ecë sërisht falë ristabilizimit të lidhjes midis trurit dhe palcës kurrizore duke përdorur një “urë dixhitale”. Kjo ndërfaqje kompjuterike e trurit përbëhet nga dy implante elektronike, të cilat janë të vendosura në tru dhe shtyllën kurrizore.

Në tru implanti është instaluar në zonën përgjegjëse që kontrollon lëvizjen e këmbëve, duke përkthyer sinjalet elektrike që gjenerohen kur ne ecim. Në të njejtën mënyrë, implanti tjetër është pozicionuar në pjesën e palcës kurrizore që kontrollon lëvizjen e këmbëve.

Shkencëtarët tregojnë se si kjo teknologji “transformon mendimin në një veprim”, duke riparuar ndërlidhjen e dëmtuar midis trurit dhe regjionit spinal përkatës. Pacienti i parë ishte një hollandez 40 vjeçar me emrin Gert-Jan Oskam, i cili dëmtoi palcën kurrizore në një aksident me biçikletë kur punonte në Kinë në vitin 2011.

Ky aksident e kishte lënë të paralizuar, megjithatë ai arriti të shikonte përmirësim vetëm disa ditë pasi kirurgët vendosën implantet.

“Gjëja më surprizuese ndodhi në ditën e dytë. Brenda 5 minutash, unë arrija të kontrolloja muskujt e legenit." tregon Oskam. Që nga ajo kohë, pas një trajnimi të gjatë të pacientit, ai është në gjendje të ecë si dhe të ngjisë shkallët.

Ky person u trajtua nga neuroshkencëtarët në Lausanne University Hospital dhe University of Lausanne, ndërkohë që implantet u zhvilluan nga French Atomic Energy Commission.

Sapo implantet në tru kapin sinajlet elektrike, ato nxisin implantin në palcën kurrizore që të lëshojë sinjale për të aktivizuar muskujt e këmbëve. Një tjetër arritje është se pacienti arriti të përmirësonte perceptimet dhe aftësitë motore dhe kur ura dixhitale ishte e fikur, duke arritur të ecë me paterica.