Ja cilat janë 5 prezantimet kryesore në eventin “California Streaming” të Apple

Apple sapo ka përfunduar eventin e saj “California Streaming” ku ka prezantuar shumë produkte të reja, përfshirë këtu dhe serinë e re të iPhone 13.

Nëse ju nuk keni kohë të ndiqni eventin e plotë të organizuar nga Apple, keni ardhur në vendin e duhur për të gjetur një përmbledhje të prezantimeve kryesore në ditën e sotme.

Seria e iPhone 13

U prezantuan 4 pajisje të reja gjatë këtij eventi: iPhone 13 mini, iPhone 13, iPhone 13 Pro dhe iPhone 13 Pro Max. Ato janë të pajisura me proçesorin e ri A15, një notch 20% më të vogël se në gjeneratën e kaluar dhe kamera të përmirësuara në pjesën e pasme.

iPhone 13 mini dhe iPhone 13 përfshijnë 2 kamera në pjesën e pasme të pozicionuara diagonalisht, një wide dhe një ultrawide, të cilat ofrojnë një performancë të përmirësuar në ambiente me pak dritë falë sensorit më të madh. iPhone 13 mini ka një ekran 5.4 inç, ndërsa iPhone 13 e ka ekranin 6.1 inç. Ndryshe nga versionet Pro, këto dy pajisje nuk e kanë të integruar ekranin me refresh rate 120Hz. Çmimet e tyre fillojnë nga $699 dhe $799 respektivisht.

iPhone 13 Pro dhe Pro Max, si pajisjet më high-end, ofrojnë disa shërbime ekstra. Përveç teknologjisë së re ProMotion (refresh rate 120H) në ekranet 6.1 dhe 6.7 inç, këto pajisje kanë në pjesën e pasme dhe një kamera telephoto që zmadhon 3x, duke bërë të mundur zmadhimin optik 6x përgjatë të gjithë kamerave. Këto kamera janë në gjendje të regjistrojnë video në formatin ProRes, i cili i jep përdoruesve më tepër kontroll mbi përmbajtjen e regjistruar. Vlen të përmendet se jetëgjatësia e baterisë është përmirësuar në të gjitha pajisjet. Çmimet për iPhone 13 Pro dhe Pro Max fillojnë nga $999 dhe $1099.

Apple Watch Series 7

Apple Watch Series 7 vjen këtë vit me dy përmasa më të mëdha të ekranit, 41 dhe 45mm, me një dizajn që është pothuajse i njejtë me atë të vitit të kaluar. Disa elementë të ndërfaqjes janë përshtatur më mirë në ekranin më të madh, duke përfshirë dhe një tastierë të plotë në disa raste. Ky model fillon nga $399, por ju duhet të prisni disa kohë që pajisja të dalë në treg. Gjithashtu Apple prezantoi disa ndryshime në Fitness Plus, një shërbim për stërvitje.

iPad Mini

Një tjetër produkt që u prezantua gjatë këtij eventi është dhe iPad Mini. Ai ka një dizajn tërësisht të ri, të ngjashëm me iPad Air që u prezantua në 2020, ka një ekran 8.3 inç, një sensor Touch ID në butonin e ndezjes dhe një kamera ultrawide selfie që suporton teknologjinë Center Stage. Çmimi i iPad Mini fillon nga $499.

Gjenerata e 9-të e iPad

Apple prezantoi dhe një iPad të ri të gjeneratës së 9-të me proçesor A13 Bionic. Ai është i pajisur me të njejtën kamera ultrawide selfie që gjendet në iPad Mini. Versioni bazë me 64GB internal storage fillon nga çmimi $329.

Software i update-uar

Apple ka përgatitur bashkë me këto pajisje software-t e rinj të përmirësuar si iOS 15, iPadOS 15 dhe watchOS 8 të cilat do të mund të shkarkohen duke filluar nga data 20 shtator.