Në samitin ACT NOW 2025, që u zhvillua në Tiranë, u prezantua zyrtarisht fushata “Albania Future Now”, një iniciativë e programit EU4Innovation, financuar nga BE dhe qeveria gjermane, zbatuar nga GIZ në Shqipëri. Fushata synon të promovojë ekosistemin e inovacionit në Shqipëri në tregun kombëtar dhe ndërkombëtar, duke theksuar rolin në rritje të vendit si një pikë referimi për zhvillimet teknologjike dhe digjitale në rajon.
Samiti mblodhi në Tiranë aktorë kyç nga fusha e teknologjisë, politikëbërjes, investimeve dhe startup-eve. Në qendër të diskutimeve ishin temat që po formësojnë të ardhmen, përfshirë inteligjencën artificiale, kibernetikën e gjeneratës së re dhe vizionin për “Shqipërinë Dixhitale 2030”.
Në fjalën e tij të hapjes, ministri i Ekonomisë, Kulturës dhe Inovacionit, z. Blendi Gonxhe, u ndal te rrugëtimi i ekosistemit të inovacionit në Shqipëri, duke e përshkruar atë si një transformim rrënjësor nga një “shkretëtirë” dixhitale në një mjedis të gjallë dhe të ndërveprueshëm.
Në dekadën e fundit, kemi parë një zhvillim të jashtëzakonshëm falë përkushtimit të aktorëve lokalë dhe mbështetjes ndërkombëtare. Sot, Shqipëria është kthyer në një qendër rajonale inovacioni me potencial unik – që kombinon talentin lokal, kostot konkurruese dhe një komunitet dinamik me aspirata globale. Nuk ka pasur kurrë një moment më të përshtatshëm për të zhvilluar inovacionin në Shqipëri. Në bashkëpunim të ngushtë me partnerët tanë vendas dhe ndërkombëtarë, kemi identifikuar pikat kyçe që e vendosin vendin fuqishëm në hartën globale të inovacionit.
Blendi Gonxhe, Ministër i Ekonomisë, Kulturës dhe Inovacionit
Fushata “Albania Future Now” e paraqet Shqipërinë si një vend evropian në mendësi, kulturë dhe pozicionim gjeografik. Me një fuqi punëtore të kualifikuar dhe një klimë inovative në rritje, vendi ofron kushte të favorshme për sipërmarrje, kërkim dhe investime të lidhura me teknologjinë.
Përmes kësaj fushate, EU4Innovation dhe partnerët e saj synojnë të tërheqin vëmendjen e investitorëve ndërkombëtarë dhe të nxisin bashkëpunimet ndërkufitare në fushën e inovacionit dhe teknologjisë, duke e pozicionuar Shqipërinë si një nyje strategjike në Ballkanin Perëndimor.
