Me afrimin e IFA 2025 në Berlin, ku Geek Room dhe Neptun do të jenë të pranishëm për të informuar ndjekësit rreth inovacioneve më të reja nga bota e teknologjise, vëmendja është e përqendruar tek risitë që kompanitë do të prezantojnë. Acer ka vendosur të ofrojë një pamje paraprake të produkteve që do të sjellë, duke mbuluar gamën nga pajisjet e fuqishme për gamers deri tek opsionet më të përballueshme si Chromebook.
Seria Nitro dhe Predator do të jetë për lojtarët dhe profesionistët që kërkojnë performancë të lartë
Modelet Nitro V 16 dhe 16S, të pajisura deri me Intel Core i9-2700H dhe RTX 5070, do të dalin në tetor me çmim fillestar $999.99. Për desktop, Acer prezanton Nitro 70 me Ryzen 9 9950X3D dhe RTX 5090, si dhe Nitro 50 me Ryzen 7 8700G dhe RTX 5080, me detaje për çmimet dhe datat ende të panjohura.
Në anën tjetër, seria Predator kombinon lojërat me përdorime profesionale. Laptopi Helios 18P AI sjell procesorin Ultra 9 285H dhe RTX 5090, i përshtatshëm për gaming por edhe për modelim 3D. Ndërsa për desktop, Predator Orion 7000 dhe 5000 ofrojnë deri në Ultra 9 285K, RTX 5090 dhe deri 128GB RAM. Helios 18P do të nisë nga $3,999.99, ndërsa çmimet dhe datat e Orion mbeten për t’u konfirmuar.
Për ata që preferojnë opsione më të lira, Acer sjell Chromebook Plus Spin 514, me 50 TOPS fuqi për detyra AI dhe një abonim 12-mujor falas në Google AI Pro. Do të jetë i disponueshëm në SHBA në tetor për $699.99. Gjithashtu, Chromebox CXI6 me Intel Core i7-1500U dhe Chromebox Mini CXM2 me Intel Core i3 N350 ofrojnë zgjidhje kompakte. CXI6 do të dalë në dhjetor për $749.99, ndërsa Mini CXM2 në fillim të 2026 për $329.99.
Me këtë gamë, Acer synon të tërheqë si lojtarë e profesionistë të avancuar, ashtu edhe përdorues që kërkojnë pajisje praktike e të aksesueshme.
