Google po punon për të zhvilluar një teknologji të re AI e cila do të ndihmojë në deshifrimin e recetave të shkruajtura me një shkrim shumë të keq nga doktorët. Kjo gjë u bë e ditur gjatë konferencës së përvitshme në Indi dhe përshkruhet mjaft mirë në blog.
Ky shërbim do të jetë pjesë e Google Lens. Lens aktualisht mund të kopjojë dhe kuptojë mjaft mirë shkrimin e dorës nga smartphone-i apo kompjuteri juaj. Teknikisht, Google Lens duhet të ishte në gjendje të lexonte dhe shkrimin e dorës së doktorëve si çdo tekst tjetër, por për fat të keq ky shkrim është shumë herë më i keq se shkrimi i personave të tjerë, kryesisht për shkak të lodhjes së duarve.
Ju do të jeni në gjendje të bëni upload fotografinë e recetës tuaj dhe të lejoni Lens që të skanojë imazhin, të listojë medikamentet dhe t’ju ofrojë automatikisht informacione mbi ilaçet që ju do të përdorni.
Jo rrallë herë farmacistët kanë lexuar gabim recetat e shkruajtura me shkrim të keq dore nga doktorët dhe kanë pajisur pacientët me ilaçe të gabuara. Megjithatë në shumë vende të ndryshme ka nisur shkruajta e recetave nëpërmjet kompjuterave, për të parandaluar këtë fenomen.
Google u shpreh se në zhvillimin e këtij shërbimi do të ndihmojnë dhe farmacistët me ekspertizën e tyre.
