Gjermania, nën drejtimin e kancelarit të ri Friedrich Merz, po shqyrton vendosjen e një takse prej 10% për platformat gjigande si Google dhe Facebook. Sipas Reuters, kjo nismë vjen pas një marrëveshjeje politike të arritur më herët gjatë vitit për të ndjekur aplikimin e tarifave për shërbimet digjitale nga kompanitë e mëdha të internetit.
Ministri i Kulturës në Gjermani, Wolfram Weimer, e mbështeti fuqishëm propozimin. Në një intervistë për revistën Stern, ai kritikoi kompanitë teknologjike që gjenerojnë miliarda euro në Gjermani, duke përfituar nga infrastruktura, mediat dhe kultura e vendit, por që paguajnë shumë pak taksa dhe investojnë shumë pak në shoqëri.
Kjo lëvizje do ta vendoste Gjermaninë në një linjë me vende të tjera që tashmë kanë ndërmarrë hapa të ngjashëm. Britania, Franca, Italia, Spanja, Turqia, India, Austria dhe Kanadaja kanë miratuar ose propozuar ligje të ngjashme për të taksuar shërbimet digjitale të ofruara nga gjigantët teknologjikë.
Megjithatë, taksa e propozuar mund të shkaktojë tensione ndërkombëtare, veçanërisht me Shtetet e Bashkuara. Presidenti Donald Trump paralajmëroi në shkurt se vendet që vendosin taksa ndaj kompanive amerikane të teknologjisë mund të përballen me tarifa ndëshkuese nga SHBA. Nëse Gjermania e zbaton këtë taksë, ajo rrezikon një përplasje tregtare me Amerikën, që mund të ketë pasoja më të gjera ekonomike.
Rregullorja është ende në fazën e diskutimit dhe nuk është finalizuar, por përfaqëson një hap të rëndësishëm në përpjekjet e Gjermanisë për të taksuar ekonominë digjitale në mënyrë më të drejtë.
