Gazeta italiane Il Foglio është e para në botë që publikon një botim të prodhuar tërësisht nga inteligjenca artificiale.
Nisma e Il Foglio është pjesë e një eksperimenti gazetaresk njëmujor që synon të tregojë ndikimin që teknologjia AI ka “në mënyrën tonë të punës së përditshme“, tha redaktori i gazetës, Claudio Cerasa.
“Do të jetë gazeta e parë e përditshme në botë në stendat e gazetave e krijuar tërësisht duke përdorur inteligjencën artificiale”, tha Cerasa. “Për gjithçka. Për shkrimet, titujt, citimet, përmbledhjet. Dhe, ndonjëherë, edhe për ironi.” Ai shtoi se rolet e gazetarëve do të kufizohen në “bërjen e pyetjeve [në një mjet AI] dhe leximin e përgjigjeve”.
Eksperimenti vjen ndërsa organizatat e lajmeve në mbarë botën po përballen me mënyrën se si duhet të rregullohet AI. Faqja e parë e edicionit të parë të Il Foglio AI mbart një histori që i referohet presidentit të SHBA-së, Donald Trump. Faqja e parë përmban gjithashtu një rubrikë me titull “Putin, 10 tradhtitë“, me artikullin që thekson “20 vjet premtime të thyera, marrëveshje të grisura dhe tradhtitë” nga presidenti rus Vladimir Putin.
Artikujt ishin të strukturuar, të drejtpërdrejtë dhe të qartë, pa gabime të dukshme gramatikore. Megjithatë, asnjë nga artikujt e publikuar në faqet e lajmeve nuk citon drejtpërdrejt ndonjë qenie njerëzore.
Në faqen e fundit shfaqen disa letra nga lexuesit të gjeneruara nga AI për redaktorin, me njërin që pyet nëse AI do t’i bëjë njerëzit “të padobishëm” në të ardhmen. “Inteligjenca artificiale është një risi e madhe, por ajo ende nuk di të porosisë një kafe pa gabuar për sasinë e sheqerit”, thuhet në përgjigjen e gjeneruar nga AI.
Cerasa tha se Il Foglio AI pasqyronte “një gazetë të vërtetë” dhe ishte produkt i “lajmeve, debateve dhe provokimeve“. Por ishte gjithashtu një terren testimi për të treguar se si AI mund të funksiononte në praktikë.
