Ndërsa përdoruesit e Google ankohen për përkeqësimin e cilësisë së rezultateve të kërkimit dhe integrimin e inteligjencës artificiale gjenerative, organizatat evropiane po punojnë për të zhvilluar alternativa. Një nga këto iniciativa është krijimi i Open Web Index që synon të mbështesë motorë të rinj kërkimi dhe të zvogëlojë varësinë e Evropës nga Google dhe Bing.
Provat fillestare të Open Web Index do të nisin muajin e ardhshëm. Ky projekt synon të ndihmojë vendet evropiane të largohen nga motorët e mëdhenj të kërkimit të bazuar në reklama dhe AI, duke promovuar alternativa jofitimprurëse. Vetë Open Web Index nuk është një motor kërkimi, por funksionon si një bibliotekë digjitale nga ku motorët e kërkimit mund të marrin të dhëna nga uebi.
Rregullatorët në Mbretërinë e Bashkuar dhe BE kanë sfiduar vazhdimisht gjigandët amerikanë të teknologjisë si Google dhe Apple, veçanërisht në lidhje me kërkimin dhe AI. Përdoruesit raportojnë një rënie të cilësisë së kërkimit, ndërsa faqet ankohen se Google e vështirëson largimin nga platforma e saj dhe AI shpesh jep informacione të pasakta.
Për këtë qëllim, një konsorcium me 14 anëtarë (universitete, qendra të të dhënave, kompani teknologjike dhe CERN) po punon për ndërtimin e infrastrukturës së një indeksi të hapur. Ky mund të ndihmojë ndërmarrjet e vogla dhe të mesme të krijojnë motorë kërkimi apo modele të mëdha gjuhësore (LLM) që nuk varen nga reklamat apo kompanitë amerikane.
Projekti synon të përputhet me vlerat, rregulloret dhe gjuhët e BE-së. Testimi i parë publik do të zhvillohet më 6 qershor përmes Zoom, duke ofruar qasje në rreth një petabyte përmbajtje. Në të ardhmen, indeksi do të zgjerohet deri në 10 petabyte.
