Pas ardhjes në pushtet të presidentit të ri të SHBA, Donald Trump, u vunë re menjëherë përpjekjet për të limituar sa më tepër varësinë ndaj shteteve të tjera për sa i përket produkteve të teknologjisë dhe jo vetëm. Kjo iniciativë ka nxitur dhe Evropën që të ndërmarrë disa masa për të limituar gjithashtu varësinë ndaj shërbimeve që ofrohen nga kompani me bazë në SHBA, si përshembull shërbimet cloud apo interneti satelitor.
Gjiganti evropian i mbrojtjes Leonardo shpreson të krijojë një aleancë satelitore me Airbus dhe Thales brenda disa muajsh për të realizuar “Project Bromo”, siç u bë e ditur nga vetë CEO i kompanisë, ndërsa kontinenti kërkon për alternativa të Starlink të Elon Musk.
Pas muajsh bisedimesh, Roberto Cingolani i Leonardo tha: “Për momentin, ne po punojmë së bashku dhe po përpiqemi të gjejmë nëse ka një sinergji të mirë të mundshme, nëse kjo është e përshtatshme nga pikëpamja e tregut dhe, natyrisht, gjithashtu nëse kjo është e pranueshme nga pikëpamja antitrust”.
Reuters raportoi në fillim të kësaj jave se të tre kompanitë ishin në bisedë me rregullatorët evropianë për një marrëveshje të mundshme.
Nga ana tjetër operatori francez satelitor Eutelsat u vu në qendër të vëmendjes javën e kaluar si një zëvendësues i mundshëm i Starlink në të gjithë Evropën dhe potencialisht në Ukrainë. Eutelsat aktualisht ka 653 satelitë OneWeb që rrotullohen rreth Tokës, secili rreth 1200 km mbi sipërfaqe. Eutelsat tregoi se ofron të njëjtin mbulim dhe shpejtësi si Starlink.
